ઍમેઝૉનના ફાઉન્ડર જેફ બેજોઝની એક્સ-વાઇફ મૅકેન્ઝીએ છૂટાછેડા દરમ્યાન અધધધ કહી શકાય એટલી રકમ વળતરરૂપે મેળવી હતી. ઍમેઝૉનના ૪ ટકા શૅર એટલે કે ૧.૯૭ કરોડ શૅર તેને મળ્યા હતા. જેના પગલે મૅકેન્ઝી રાતોરાત અબજોપતિઓની યાદીમાં આવી ગઈ હતી. હાલમાં મૅકેન્ઝી નથી કોઈ જૉબ કરતી કે નથી કોઈ બિઝનેસ અને છતાં તે વિશ્વની ધનિક મહિલાઓની યાદીમાં સ્થાન ધરાવે છે.
સૌથી ધનિકોની યાદીમાં સમાવેશ થયો ત્યારે જ મૅકેન્ઝીએ જાહેરાત કરી હતી કે તે જેફ પાસેથી વળતર એટલા માટે લેવા માગે છે, કેમ કે તે એ પૈસા સમાજસેવામાં વાપરવા માગે છે. તાજેતરમાં મૅકેન્ઝીબહેન ફરીથી સમાચારમાં ચમક્યાં છે. તેમણે જાહેરાત કરી હતી કે તેમણે તાજેતરમાં ૩૬૧ સ્વૈચ્છિક સંસ્થાઓને ૫૩૦૦ કરોડ રૂપિયા દાન આપ્યા છે. મૅકેન્ઝી સ્કૉટે સંસ્થાઓને ફન્ડ માટે અરજી કરવા કહ્યું હતું અને લગભગ ૬૦૦૦ જેટલી સંસ્થાઓની અરજી આવી હતી, એમાંથી ૩૬૧ સંસ્થાઓને દાન માટે પસંદ કરવામાં આવી હતી.