મૉલદીવ્ઝના પ્રેસિડન્ટ મોહમ્મદ મોઇઝ્ઝુએ ભારતની નિંદા કરતાં એક્સટર્નલ અફેર્સ મિનિસ્ટર એસ. જયશંકરે તેમને સણસણતો જવાબ આપ્યો છે. તેમના જવાબની અમિતાભ બચ્ચને પ્રશંસા કરી છે. મોહમ્મદ મોઇઝ્ઝુએ જણાવ્યું હતું કે ભારત તેના સબ-કૉન્ટિનેન્ટ પર ધાક જમાવવા માગે છે. તેમના આવા નિવેદન પર જવાબ આપતો વિડિયો સોશ્યલ મીડિયા પ્લૅટફૉર્મ ઍક્સ પર અમિતાભ બચ્ચને શૅર કર્યો છે.
એ વિડિયોમાં એસ. જયશંકરે કટાક્ષમાં કહ્યું કે ‘અમે કોઈને ડરાવી નથી શકતા. ધમકાવનારા પોતાના પાડોશીને તકલીફના સમયે ૪.૫ બિલ્યન ડૉલરની મદદ નહીં કરતા હોય. વિશ્વમાં ફેલાયેલા કોવિડ દરમ્યાન અન્ય દેશોને વૅક્સિનની મદદ ન કરે. દુનિયાના કેટલાક ભાગમાં ચાલતા યુદ્ધ દરમ્યાન લોકોનું જીવન અસ્તવ્યસ્ત થતાં તેમને ફૂડ, ફ્યુઅલ અને ફર્ટિલાઇઝર્સ પહોંચાડવા માટે પોતાના જ નિયમોમાં બદલાવ ન કરે.’ તેમની આ વાતને બિરદાવતાં અમિતાભ બચ્ચને લખ્યું કે ‘વાહ! એકદમ બરાબર કહ્યું.’