રાજસ્થાની ફૂડનો સ્વાદ ખૂબ જ અલગ હોય છે. રાજસ્થાની ફૂડમાં રાજસ્થાની લાપસી પણ એક ફેમસ ડીશ છે. રાજસ્થાની લાપસી સ્વાસ્થ્ય માટે પણ ઘણી ફાયદાકારક હોય છે. કારણ કે, તે દળિયામાંથી બનાવવામાં આવે છે. રાજસ્થાનની સાથે સાથે ગુજરાતમાં પૂજાના સમયે રાજસ્થાની લાપસી બનાવવામાં આવે છે.
જો કે, રાજસ્થાની લાપસી કોઈપણ સમયે બનાવીને ખાઈ શકાય છે.
રાજસ્થાન અને ગુજરાતમાં લોકો નાસ્તામાં આ લાપસી ખાવાનું પસંદ કરે છે. જો તમારા ઘરે કોઈ મહેમાન આવેલ છો તો તમે તેને રાજસ્થાની લાપસી બનાવીને સર્વ કરી શકો છો. ત્યારે નોંધી લો રાજસ્થાની લાપસી બનાવવાની સરળ રેસિપી.
રાજસ્થાની લાપસી બનાવવા માટેની સામગ્રી
1 કપ દળિયા
1/2 કપ ઘી
3/4 કપ ખાંડ
5-6 એલચી
2 ચમચી કાજુ
2 ચમચી કિસમિસ
રાજસ્થાની લાપસી બનાવવાની રીત
સૌ પ્રથમ કુકરને ગેસ પર ગરમ કરવા મૂકી દો.
હવે તેમાં ઘી નાખીને ઓગળી લો.
ત્યારબાદ તેમાં દળિયા ઉમેરીને લાઈટ બ્રાઉન થાય ત્યાં સુધી સતત ચમચા વડે હલાવતા રહો.
દળિયા શેકાઈ ગયા પછી, દળિયામાં 3½ કપ પાણી ઉમેરીને કૂકર બંધ કરી લો.
કૂકરમાં એક સીટી વાગ્યા બાદ ગેસ બંધ કરી દો. પ્રેશર છૂટી જાય પછી કૂકર ખોલી લો.
એલચીને છોલીને તેનો પાવડર બનાવી લો.
કાજુના નાના-નાના ટુકડા કરી લો.
દળિયામાં ખાંડ ઉમેરીને મિક્સ કરો.
તેમાં સમારેલા કાજુ, કિસમિસ, એલચી પાવડર અને થોડું ઘી ઉમેરીને બધું બરાબર મિક્સ કરી લો.
ખાંડ ઓગળવા સુધી લાપસીને થવા દો.
લાપસી બનીને તૈયાર છે, ગેસ બંધ કરી દો.
લાપસીને બાઉલમાં કાઢીને કાજુથી ગાર્નિશ કરો.
તૈયાર છે સ્વાદિષ્ટ લાપસી, સર્વ કરીને તેનો સ્વાદ માણો.